14 декабрҙә “Родина” кинотеатрында Рәсәй халыҡтарының мәҙәни мираҫы йылына һәм Башҡорт теле көнөнә арналған “Ал да сәс нур халҡыңа” асыҡ дәресе үтте.

Асыҡ дәрес барышында студенттар Башҡортостандың халыҡ шағиры Шәйехзада Бабичтың тормошо һәм ижадына арналған “Бабич” нәфис фильмын ҡарағандан һуң билдәле Башҡортостандың һәм Рәсәйҙең халыҡ артисткаһы, Башҡортостан Республикаһының Салауат Юлаев исемендәге дәүләт премияһы лауреаты, Заһир Исмәғилев исемендәге Өфө дәүләт сәнғәт институты профессоры Таңсулпан Даһи ҡыҙы Бабичева менән осрашты. Дәрестең рефлексия өлөшөн Башҡортостан Республикаһының Мәғарифты үҫтереү институтының башҡорт һәм туған телдәр һәм әҙәбиәттәр кафедраһының мөдире, филология фәндәре кандидаты, доцент, Башҡортостан Республикаһының Мәғариф алдынғыһы Эльвира Фидаил ҡыҙы Рәхимова алып барҙы.

«Беҙҙең колледжда туған телде өйрәнеүгә һәр яҡлап ҙур иғтибар бүленә. "Алтын ҡурай" кабинеты йыһазландырылған. Был кабинет Өфө ҡалаһы колледждары араһында иң яҡшы башҡорт теле кабинеты конкурсында ҡатнашты һәм беренсе урын яуланы. Уҡыу йортонда төрлө милли саралар йыш үткәрелә. Быйылғы уҡыу йылында «Родина» кинотеатры менән берлектә тормошҡа ашырылған « РӘМИ дәресе» проектына старт бирелде. Бөгөнгө “Ал да сәс нур халҡыңа” дәресе лә проект сиктәрендә үткәреләсәк сараларзың береһе булып тора. Яңы форматтағы саралар тыуған ил тарихын өйрәнеү генә түгел, ә йәш быуынға патриотик тәрбиә биреү ҙә ул. Улар студенттарҙа туған телдә аралашыу оҫталығын үҫтереүгә булышлыҡ итә, тыуған яҡҡа, телгә һәм халыҡҡа һөйөү уята”, — тип билдәләне Өфө сауҙа-иҡтисад колледжы директоры Ришат Сабитов.

Өфө сауҙа-иҡтисад колледжының матбуғат хеҙмәте